دافغانستان دکرنیزو علومو او ټکنالوژي ملي پوهنتون د رئیس پیغام!

 

7 میاشتې 2 اونی ago

﷽

السَّلامُ عَلَيْكُم ورَحْمَةُ اللهِ وَبَرَكاتُهُ!
الحمدُ لله ربِّ العالمين، والصلاةُ والسلامُ على سيّدنا محمدٍ وعلى آله وصحبه أجمعين، وبعد!

!قدرمنو علم‌پالو، دين‌پالو، مجاهدپالو او تاريخ‌ پالو هېوادوالو 
بې له شکه د يوه ملت عزت، وقار، خپلواکي او هر اړخيز پرمختګ د هغوی د افرادو د فکري سلامتۍ، اسلامي باور، علمي بصيرت او د متخصصو، متعهدو او مسلکي ظرفيتونو له شتون سره نه شلېدونکی تړاو لري 
بناءً د افغانستان د کرنيزو علومو او ټکنالوژۍ ملي پوهنتون د لوړو زده کړو وزارت تر چتر لاندې له هغو بنسټيزو علمي مرکزونو څخه شمېرل کېږي چې اساسي موخه يې د عصري علومو، ژورو څېړنو، توليدي بهيرونو، علمي ترويج او نوې ټکنالوژۍ له لارې د هېواد د کرنې او مالدارۍ سکتور بنسټيزه پياوړتيا ده

دغه علمي او تحصيلي نهاد د ليسانس او ماستري په کچه د باکيفيته، متعهدو او فکري پلوه روزل شوو علمي، مسلکي او متخصص کادرونو د روزنې دروند مسؤليت پر غاړه لري، تر څو ياد کادرونه د امت او وطن د خدمت په مقدس ميدان کې د عملي رسالت اداء کوونکي وګرځي 
کرنه د يو هېواد د اقتصادي نظام د ملا تير حيثيت لري، او د معاصرو ټکنالوژيو مدبرانه کارونه کولای شي دغه حياتي سکتور له رکود څخه د ودې، ځان‌بسياینې او پايدار پرمختګ پر لور سوق کړي

له همدې امله، ياد تحصيلي بنسټ د لوړو زده کړو وزارت د نافذه قوانینو، مقرراتو او لارښوونو په رڼا کې پوره کوښښ کوي چې د عصري لابراتوارونو د تجهيز، د علمي څېړنو د پياوړتيا، او د توليدي او تطبيقي پروګرامونو د پراختيا له لارې د زده کړو علمي چاپېريال لا غني، منظم او معياري کړي

زه د دې علمي مرکز د درنو استادانو، څېړونکو او اداري کارکوونکو له نه ستړې کېدونکو هڅو څخه په درنه مننه او قدردانۍ يادونه کوم، چې د ملي وجدان، اسلامي مسؤليت او اخلاص له مخې د علم، خدمت او اصلاح په لاره کې په ثابت قدمۍ روان دي

له ټولو قدرمنو علمي او اداري کارمندانو، محصلینو او همکارانو څخه هيله کوم چې له سختو حالاتو او ازمېښتونو وروسته د اسلامي سپېڅلي نظام تر سيوري لاندې د تحصيلي بنسټونو بيا فعالېدل د الله جل جلاله د ځانګړي رحمت، لطف او الهي نصرت څرګنده نښه وبولي او په پوره امانتدارۍ، تقوا او علمي ژمنتيا سره له دې تاريخي فرصته ګټه پورته کړي، څو د هېواد د ابادۍ، د ملت د سوکالۍ او د اسلامي نظام د ثبات، تقويې او استحکام په لار کې اغېزمن خدمت ترسره شي

والسلام عليكم ورحمة الله وبرکاته