اناسټو پوهنتون او افغان بېسیم د همکارۍ په اړه ناسته وکړه

د افغانستان د کرنیزو علومو او ټکنالوژۍ ملي پوهنتون دوه کسیز پلاوي د چهارشنبې په ورځ (۱۹/۶/۱۴۰۴هـ ش) د افغان بیسیم د جنوب‌غرب زون د رئیس ښاغلي نثار احمد رحیمي په دفتر کي د اجنډا مطابق مهمه غونډه وکړه.

په پیل کي ښاغلي رحیمي د پوهنتون پلاوي ته هرکلی ووایه او د پوهنتون د علمي او ملي خدمتونو ستاینه یې وکړه. ورپسې د اړیکو او انسجام مرستیال پوهنیار فرید احمد ولي د پوهنتون د تاریخچې، لیرلید، استادانو او محصلینو په اړه مفصل معلومات وړاندي کړل او د څلورو مهمو برخو لپاره یې د افغان بيسیم همکارۍ وغوښتله:

۱️⃣ د پوهنتون د دوو لویو دروازو جوړول او نصب

۲️⃣ د ملي کنفرانس د مالي ملاتړ برخه

۳️⃣ د استادانو او کارمندانو لپاره د ځانګړو سیمکارډونو ستونزو حل

۴️⃣ د نوو استادانو او کارمندانو لپاره د تخفیفي سیمکارډونو برابرول

ښاغلي رحیمي د همکارۍ ډاډ ورکړ او وویل چي افغان بېسیم د ټولنیزو خدمتونو ترڅنګ د تعلیم، سپورټ او چاپېریال په برخه کي هم خپل حضور لري. هغه څرګنده کړه چي د دروازو جوړول او د کنفرانس مالي ملاتړ به د راتلونکي (۲۰۲۶م) کال د بودجې له مخې عملي کړي، خو د سیمکارډونو ستونزي به ژر تر ژره حل او نوي سیمکارډونه به د اړتیا پر اساس برابر کړي.

غونډه د دعا په ویلو سره پای ته ورسېده.

1404/6/29

نشراتو امريت