د اناسټو پوهنتون په څېړنیز فارم کي د حیواني کلینیک د جوړېدو خښته کښېښودل سوه
د افغانستان د کرنیزو علومو او ټکنالوژۍ ملي پوهنتون (اناسټو) په څېړنیز فارم کي د یو باب حیواني کلینیک د جوړېدو ساختماني چاري د یو لړ مراسمو په ترڅ کي پیل سوې، چي د پوهنتون رئیس، مرستیالانو، د پوهنځیو رئیسانو او یو شمېر استادانو پکښي ګډون کړی و.
یاد کلینیک چي د ۳،۰۵۷،۹۷۲ افغانۍ په لګښت جوړېږي، د نظري برادران ساختماني شرکت له لوري به د ۹۰ ورځو په موده کي جوړ او ګټي اخیستني ته وسپارل سي. په طرحه کي يې د حیواني علومو اړوند د عملي زدهکړو او څېړنیزو فعالیتونو لپاره اړیني اسانتیاوي په پام کي نیول سوي، چي لابراتوار، درملتون، د عملیاتو خونه او د محصلینو او استادانو د عملي کار لپاره ځانګړي ځایونه پکښي شامل دي.
د مراسمو په پیل کي د افغانستان د کرنیزو علومو او ټکنالوژۍ ملي پوهنتون رئیس، مولوي شبیر احمد عباس صاحب، ګډونوالو ته د ښه راغلاست ترڅنګ وویل، چي د حیواني کلینیک جوړېدل د پوهنتون د علمي او څېړنیزو بنسټونو د پیاوړتیا په برخه کي مهم ګام دی. نوموړي زیاته کړه، چي د یاد کلینیک د جوړېدو چاري به د حیواني علومو د محصلینو لپاره د عملي زدهکړو، علمي تجربو او څېړنیزو فعالیتونو په برخه کي د پام وړ اسانتیاوي رامنځته کړي. همدارنګه به استادانو ته زمینه برابره سي، څو د تدریسي فعالیتونو ترڅنګ خپلي څېړنیزي چاري په عملي او معیاري چاپېریال کي ترسره کړي.
ورپسې د پوهنتون مالي او اداري مرستیال الحاج روح الله مشال صاحب د پروژې د لګښت، ساختماني چارو او د تکميل د مودې په اړه معلومات وړاندي کړه. نوموړي وويل، چي په کلینیک کي د لابراتوار، درملتون، د عملیاتو خوني او د محصلینو او استادانو د عملي کار لپاره اړین ځایونه په پام کي نیول سوي دي.
د مراسمو په پای کي د پوهنتون د مسؤولینو له لوري د حیواني کلینیک د جوړېدو د بنسټ ډبره کښيښودل سوه او د دعا په ویلو سره د یادي ودانۍ ساختماني چاري رسماً پیل سوې.
۱۴۰۵/۰۵/۱۸
د نشراتو او عامه اړیکو آمریت
